ಭಾವದೀಪ

ಮೂಕವಿಸ್ಮಿತ

ಆ ಸಂಜೆ ನೀ ಬರಲು, ಹೂ ಹಿಡಿದು ನಿಂತಿರಲು

ನಿನ್ನ ಕಂಡ ನಾನಾದೆ ಪೂರ್ಣ ಸ್ಥಬ್ಧ ||

ಹೇಗೆ ನಾ ವರ್ಣಿಸಲಿ, ಏನೆಂದು ಬಣ್ಣಿಸಲಿ

ಹಿಂದೆಂದೂ ನೋಡಿರದ ಅಂಥ ಅಂದ ||

ಹೂ ಕಂತೆ ನೀ ಕೊಡಲು, ನಾನದನು ಪಡೆದಿರಲು

ಮನದಲ್ಲೇ ಗೀಚಿದೆನು ನಿನ್ನ ಚಿತ್ರಪಟವ ||

ಬಾಯ್ಮಾತು ಬರದಿರಲು, ಕಿವಿ ಗುಂಗಾಗಿರಲು

ಮರೆಸಿತ್ತು ನಿನ್ನಂದ ನನ್ನೆಲ್ಲ ಜಗವ, ನನ್ನೆಲ್ಲ ಜಗವ ||

~🪔~

ನಿನ್ನ ಹೆಸರು

ಏಕೆ  ಈ  ಪರಿ  ಇಣುಕಿಹೆ  ಎನ್ನ  ಎದೆಯೊಳಗೆ  ನೀನಿಂದು

ಕದ  ತೆಗೆದು  ಕಾಲಿಟ್ಟು  ಒಳ  ಹೊಕ್ಕಿ  ನೋಡೊಮ್ಮೆ ||

ಬೆಳಕಿಹುದು  ಹೊಳಪಿಹುದು  ಎನ್ನ  ಮನವೆಂಬ  ಮನೆಪೂರ

ಇದಕೆ  ಕಾರಣ  ನಾ  ಬರೆದ  ನಿನ್ನ  ಹೆಸರು  ಹಿಂದೊಮ್ಮೆ ||

~🪔~

ಪ್ರೇಮ ಪೂಜೆ

ನಾ ನಿನ್ನ ಪ್ರೇಮಿ, ನೀ ನನಗೆ ದೇವತೆಯು

ಪ್ರೀತಿ ಪೂಜೆಗೆ ಅಣಿಯು ಈ ನನ್ನ ಜೀವ ||

ಗುಟ್ಟಾದ ಪ್ರೀತಿಯನು ಶ್ಲೋಕ ರೂಪದಿ ಹೇಳ್ವೆ

ಆಲಿಸಲು ನೀ ನನ್ನ ಮನದ ಭಾವ ||

ನಿನಗೆ ನೈವೇದ್ಯೆಗಯ್ಲು ಹೃದಯವನೆ ತಂದಿಹೆನು

ವರ ನೀಡಲಿನ್ನೇಕೆ ಮೀನಮೇಷ ||

ಬಹಳ ಕಾದಿಹೆನು ನಿನಗೆ, ಒಲಿದು ಬಾ ಬೇಗಿನ್ನು

ಧರಿಸಲಾಗದು ಋಷಿಯ ಈ ಹಗಲುವೇಷ ||

~🪔~

ಮಳೆ ಬರುವಾ ಹಾಗಿದೆ!

ಕರಿ ಮೋಡ ಕರಿ ಮೋಡ ಏನಿದು ನಿನ್ನಾಟ

ನೋಡಲಾರೆನು ನಾನು, ಈ ನಿನ್ನ ಮೈಮಾಟ ||

ತಡೆ ಹಿಡಿ ಭಾವನೆಯ, ಗೃಹವಿಹುದು ಬಲು ದೂರ

ನೀನೀಗಲೇ ಸುರಿದರೆ ನೆನಿಯುವೆನು ನಾ ಪೂರಾ ||

ಕರುಣೆ ತೋರು ದಯವಿಟ್ಟು, ಕೈ  ಮುಗಿದು ಕೇಳುವೆನು

ಮನೆ ತಲುಪಿದಾ ಮೇಲೆ ನಾ ನಿನಗೆ ಹೇಳುವೆನು ||

ಇರುಳು ಸುರಿಯಲು ನೀನು ಸುಂದರವೀ ಸಂಸಾರ

ನೀ ಹೀಗೆ ಮಾಡಲು ನಿನಗೆ ಇಡೀ ಜಗವೇ ಆಭಾರ ||

~🪔~

ಮಳೆಯಲಿ ಜೊತೆಯಲಿ

ರವಿ ರಾಜನು ಅಸ್ಥಮಿಸಲು, ಮೇಘ ಮುಸುಕಿದ ಜಾವ

ಮಳೆ ರಾಯನು ಕೊಂಚ ಸುರಿಯಲು, ತಣ್ಣಗಾಯಿತು ಜೀವ |

ಮನದರಸಿ ಜೊತೆಗಿರಲು, ಹೃದಯದಲಿ ಪ್ರಣಯದ ಭಾವ

ನಯನಗಳ ಸಲ್ಲಾಪದಲಿ, ಮರೆಯೋಣ ನೂರೆಂಟು ನೋವ ||

~🪔~

ಮಳೆಬಿಲ್ಲು

ಬಾನ  ಬಯಲಲಿ  ನಡೆದಿಹುದು  ಮೇಘಗಳ  ಆಟ

ನಾ  ಮುಂದು  ತಾ  ಮುಂದು  ಎಂದು  ಮಳೆಹನಿಗಳ  ಓಟ ||

ನಡುವೆ  ನೇಸರನು  ಬಂದು  ಕೊಂಚ  ಮಾಡಿಹನು  ಮಾಟ

ಇದುವೆ  ನಯನ  ನಾಟುವ  ಬಹು  ಸುಂದರ  ನೋಟ ||

~🪔~

ಸ್ನೇಹಿತೆ

ಹೇಳಬಯಸುವೆನನಿಸಿಕೆಯ, ನನ್ನೆಡೆಯೇ ಗಮನವಿರಲಿ

ಸಾಲುಗಳೇ ಸಾಲದು, ನಾನೇನೆಂದು ವಿವರಿಸಲಿ |

ಹಾಗೊಂದು ಹೀಗೊಂದು ಪದವಿಹುದೀ ಮನಸಿನಲಿ

ಸವಿಗವನವ ಬರೆದಿಹೆನು, ಹೀಗಿವಳ ಹೆಸರಿನಲಿ ||

ಸಿಹಿಸಕ್ಕರೆ ನುಡಿಯವಳು, ಸವಿಜೇನ ನಡೆಯವಳು

ಮೃದುಮಲ್ಲಿಗೆ ಮನದವಳು, ಹಸುಹಾಲ ಗುಣದವಳು |

ಬಹುನೇರ ನುಡಿಯುವಳು, ನುಡಿದಂತೆ ನಡೆಯುವಳು

ಬೆಳಗಾವಿ ಮಣ್ಣವಳು, ಕೆಚ್ಚೆದೆಯ ಹೆಣ್ಣಿವಳು ||

ಸದಾ ಹಸನ್ಮುಖಿ ಇವಳು, ನಗು ತರುವಳು ಪೂರ್ತಿ

ಪರಮಾಪ್ತಳು ನನಗೆ, ಈ ಚಿಕ್ಕ ಮೂರ್ತಿ |

ಇವಳದೀ ಕವಿತೆಗೂ ಇವಳಲ್ಲವೇ ಸ್ಪೂರ್ತಿ

ಮನದುಂಬಿ ಹರಸುವೆನು, ಇವಳದಾಗಲಿ ಕೀರ್ತಿ ||

ಪುಣ್ಯ ಮಾಡಿಹೆನು, ಇವಳ ಸ್ನೇಹವಾಯಿತು ಪ್ರಾಪ್ತಿ

ಇವಳಿಂದ ವಿಶಿಷ್ಟವು ಎನ್ನ ಗೆಳೆತನದ ವ್ಯಾಪ್ತಿ |

ಮನದಿ ಹರುಷವಿದೆ, ಈ ಸಂಗ ತಂದಿದೆ ತೃಪ್ತಿ

ನಲ್ಮೆಯ ಗೆಳತಿ ಇವಳು, ಇವಳ ಹೆಸರೂ ತೃಪ್ತಿ ||

~🪔~

ಶುಭಾಶಯ

ಕ್ಷಣ ಪ್ರತಿಕ್ಷಣ ಬಾಳ ಕಣಕಣದಲೂ ನಗುವಿರಲಿ

ನಿಮಿಷ ನಿಮಿಷವೂ ಹರುಷ ಮನದಿ ನೆಲೆಸಿರಲಿ |

ಘಂಟೆ ಘಂಟೆಗೂ ಖುಷಿಯ ಗಂಟೊಂದು ಸಿಗುತಿರಲಿ

ಕಾಲವೇ ಕಾಲವಾದರೂ ನಿನ್ನ ಸತ್ಕಾಲ ನಿಲ್ಲದಿರಲಿ ||

~🪔~

ನೆನಪು

ನೀ ತೆರಳಿರುವೆ ಎಂಬುದನು ಮರೆತು ನಾ ಹೋಗುವೆನು |

ಮರಳಿ ಬರುವೆಯೆಂದು ನಿನ್ನ ದಾರಿಯನೇ ಕಾಯುವೆನು ||

ಲಕ್ಷ ಮಂದಿಯ ಮಧ್ಯೆ ನಿನ್ನ ಕಾಣುವ ಹಂಬಲವು |

ಯಾರನೇ ನೋಡಿದರೂ ನಿನ್ನ ನೋಡಿದ ಗೊಂದಲವು ||

ನೀ ಬರುತಿದ್ದ ಹಾದಿಯಲೇ ನಿಂತು ನಾ ಕಾದಿಹೆನು |

ನಿಜವನರಿತೀಗ ಎನ್ನ ಮನೆದಾರಿ ನೋಡಿಹೆನು ||

ನೆನಪಿನಂಗಳವೀಗ ನೀನಿಲ್ಲದೀ ಊರು |

ಕಳೆದ ಕ್ಷಣಗಳ ನೆನೆದು ನಗೆ ಕೊಂಚ ನೀ ಬೀರು ||

~🪔~

ಉಡುಗೊರೆ

ಉಡುಗೊರೆಯ ಕಳಿಸಿಹೆನು ನಿನಗಾಗಿ ನಾನಿಂದು

ಕವನವ ಓದಲು ನೀ ಅರಿಯುವೆ ನಾ ಯಾರೆಂದು |

ಹಾಡಿ ಕುಣಿದು ನಲಿದಾಡು, ಈ ಸುದಿನವು ನಿನದಿಂದು

ಸದಾ ನಗುತಿರಬೇಕಂಬ ಹಾರೈಕೆಯು ನನದೆಂದೂ ||

~🪔~

ನಾ ನಿನ್ನ ಕಂದಮ್ಮ

ಗರ್ಭದಲಿ ನಿನ್ನ ಮಲಗಿರುವೆ, ಮಡಿಲಲ್ಲಿ ಮಲಗುವಾಸೆ

ಕರಳ ಬಳ್ಳಿಯ ಹಿಡಿದಿರುವೆ, ನಿನ್ನ ಬೆರಳ ಹಿಡಿಯುವಾಸೆ |

ಕೇವಲ ಕನಸಲೇ ಕಂಡಿರುವೆ, ನಿನ್ನ ಕಣ್ಮುಂದೆ ಕಾಣುವಾಸೆ

ಮುದ್ದಾದ ನಿನ್ನ ಮೊಗಕೆ, ಮುತ್ತಿನಂಥಹ ಮುತ್ತಿಡುವಾಸೆ ||

ಬೆಚ್ಚಗಿನ ಭದ್ರಕೋಟೆಯಿದು, ನಾನೇ ಮಹಾರಾಣಿ ಇಲ್ಲಿ

ಕೆಲಸವಿಲ್ಲ, ಕಾರ್ಯವಿಲ್ಲ, ದಿನಗಳೆಯುವೆ ಬರೀ ನಿದ್ದೆಯಲ್ಲಿ |

ಊಟವೂ ಇಲ್ಲೇ, ಆಟವೂ ಇಲ್ಲೇ, ನನ್ನ ಕೇಳುವರಾರಿಲ್ಲಿ!

ಇನ್ನೆಷ್ಟು ದಿನಗಳ ವಾಸವೋ, ನನಗೀ ಒಂಟಿ ಒಳಜಗದಲ್ಲಿ ||

ಈ ನಿನ್ನ ಉದರದರಮನೆಯ ಕಿರಿ ಕಂದಮ್ಮಳು ನಾನು

ನನ್ನ ನೋಡುವ ತುಡಿತ ನಿನಗಿನ್ನೂ ಬಂದಿಲ್ಲವೇನು? |

ನಿನ್ನ ಲಾಲಿಹಾಡ ಕೇಳಲು ತವಕದಿ ಕಾದಿಹೆನು ನಾನು

ಅಮ್ಮಾ ನಾನಿಲ್ಲಿರುವೆ, ನಿನಗದರ ಅರಿವಿದೆಯೇನು? ||

ಆಸೆಗಳನು ನನ್ನ ಹೇಳಿಹೆನು, ಕಿವಿಗೊಟ್ಟು ನೀನೊಮ್ಮೆ ಕೇಳಮ್ಮ

ಚೆಂದದ ನಗುವ ಬೀರಿಹೆನು, ಕಣ್ಮುಚ್ಚಿ ನನ್ನೊಮ್ಮೆ ನೋಡಮ್ಮ |

ನಿನಗಾಗಿ ಕಾದು ಕುಳಿತಿಹೆನು, ಎಂದು ಕರೆದೊಯ್ಯುವೆ ಹೇಳಮ್ಮ

ಪ್ರತಿ ಜನ್ಮದಲೂ ನೀನೇ ತಾಯಿ, ನಾನೇ ನಿನ್ನ ಮುದ್ದು ಕಂದಮ್ಮ ||

~🪔~

ರಾಜಕುಮಾರಿ

ಚೆಂದದ ಚಿನ್ನದ ರಥವನು ಏರಿ

ಮೇಲಕೆ ಜಿಗಿದು ಗಗನಕೆ ಹಾರಿ |

ಸುಂದರ ಕಾಮನ ಬಿಲ್ಲನು ಜಾರಿ

ಬಂದಳು ಒಬ್ಬಳು ರಾಜಕುಮಾರಿ ||

ಚಿಕ್ಕ ಕಾಲ್ಗಳನು ನೆಲಕ್ಕೆ ಊರಿ

ಪುಟ್ಟ ಕೈಗಳಲಿ ಮಾಯೆಯ ತೋರಿ |

ಮಲ್ಲಿಗೆ ಚೆಲ್ಲುವ ನಗುವನು ಬೀರಿ

ಬಂದಳು ನಮ್ಮ ಮುದ್ದಿನ ಪೋರಿ ||

ಅಮ್ಮನ ಚೆಂದದ ಹೆಗಲನು ಹೇರಿ

ರಾಣಿಯ ಹಾಗೆ ಮಡಿಲಲಿ ಕೂರಿ |

ಕೇಳುತ ಮಲಗಿ ಅಂದದ ಲೋರಿ

ಹೋದಳು ಗೌರಿ ನಿದಿರೆಗೆ ಜಾರಿ ||

ಹೊಳೆಯುವ ಕಂಗಳ ಓ ಸುಕುಮಾರಿ

ಗುಲಾಬಿ ಕೆನ್ನೆಯ ನೀ ವಯ್ಯಾರಿ |

ಹೊನ್ನಿನ ಗೊಂಬೆಯೇ ನೋಡಲು ನಿನ್ನ

ಓಡುತ ಬರುವಳು ಚಂದ್ರ ಚಕೋರಿ ||

~🪔~

ಬಸ್ ಬಾಲೆ

ಮನೆಗೆ ತೆರಳಲು ಹತ್ತಿದ ಬಸ್ಸಲಿ ಕಂಡಿತು ಸುಂದರ ಲೋಕ

ಎದುರಿನ ಸೀಟಲಿ ಚೆಲುವೆಯು ಇರಲು ಎದೆಯಲಿ ಸಕ್ಕರೆ ಪಾಕ ||

ಸಾರಂಗ ನಯನ, ಸ್ಟ್ರಾಬೆರಿ ಅಧರ, ದನಿ ಅವಳದು ಅತಿ ಮಧುರ

ಅಕ್ಕ ಪಕ್ಕದಲಿಹ ಪುಂಡರ ನಡುವೆ ಸಾಗುತಿಹುದೊಂದು ಸಮರ ||

ಗೀತೆಯ ಗುನುಗುತಲಿ ಕೂತಿಹಳು ತನ್ನ ಇಯರ್ಫೋನನು ತೊಟ್ಟು

ತುಂಬಿದ ನಗುವಿಗೆ ಮೆರುಗ ತಂದಿದೆ ಆ ಪುಟ್ಟ ಹಣೆಯ ಬೊಟ್ಟು ||

ನೋಡಿ ಎನ್ನನು ಕಿರುನಗಲು ಅವಳು ಎದೆಯಲಿ ನೂರೆಂಟು ಚಿಟ್ಟೆ

ಚಿಟ್ಟೆಗಳ ಜೊತೆಜೊತೆಗೆ ಕನಸಿನೂರಿಗೆ ನಾನೂ ಹಾರಿಯೇ ಬಿಟ್ಟೆ ||

ಕಣ್ಮುಚ್ಚಿ ಬಿಡುವಷ್ಟರಲಿ ಬಂದೇ ಬಿಟ್ಟಿತು ನೋಡಿ ಬನಶಂಕರಿ

ಮೆಟ್ರೋ ದಾರಿ ನಾ ಹಿಡಿಯಲು ತನ್ನ ದಾರಿ ಹಿಡಿದಳು ಪೋರಿ ||

~🪔~

ಪುಟ್ಟಿ 

ಕೋಟಿ ಕವನಗಳ ಬರೆದರೂ, ಪದಗಳೇ ಸಿಗದು ಇವಳ ಹೊಗಳಲು |

ಹುಡುಕಬೇಕಿದೆ ಪದಕೋಶವನಿನ್ನು ನಾ ಕವನವ ಇವಳ ಬರೆಯಲು ||

ಸಿಹಿಯಾದ ದನಿ, ಸವಿಜೇನ ಹನಿ, ಮಧುರ ಮಂದಹಾಸವೇ ಇವಳ ಅಸ್ಮಿತಾ |

ಮನದಲಿ ನನ್ನ ಹರುಷ ತರುವಳು ಎಂದೂ, ಹೆಸರು ಇವಳದು ರಶ್ಮಿತಾ ||

ಬಣ್ಣ ಇವಳದು ಬಿಳುಪು, ಹುಣ್ಣಿಮೆಯ ಹೊಳಪು, ನೋಡಲಿವಳು ಶಾರದೆ |

ನಿಜವನೇ ಹೇಳಿರುವೆ, ಸುಳ್ಳಲ್ಲ ನನ್ನಾಣೆ, ನೀವೊಮ್ಮೆ ಇವಳ ನೋಡಬಾರದೆ ||

ಹಾಲ್ಗೆನ್ನೆ ಮೊಗದವಳು ಅತಿಸೌಮ್ಯ ನುಡಿಯವಳು ಕೃಷ್ಣಪ್ರಿಯೆ ನಮ್ಮ ಪೋರಿ |

ಸದಾ ನಗುತಿರಲೆಂದು ಬೇಡುವೆನು ನಾನಿಂದು ಕೈ ಮುಗಿದು ರಾಧೆಯ ಕೋರಿ ||

ಅಕ್ಕರೆಯ ತಂಗಿ, ಸಕ್ಕರೆಯ ನಡೆಯವಳು, ಪುಟ್ಟಿ ಎಂದು ನಾ ಕರೆದೆ |

ನೋಡು ನೋಡುತಲೇ ನೋಡಿ, ಇವಳಿಗೀ ಕವನವನು ಈ ರೀತಿ ನಾ ಬರೆದೆ ||

~🪔~